I bagus caratan

Rahayu, puja pangastiti aturang titiang majeng ring Ida Sang Hyang Widhi Wasa. santukan sangkaning asung kertha wara nugrahan Ida buku puniki prasida kamijilang tur mangkin sampun prasida kawacén olih ida dané makasami. Puniki wantah utsaha saking Balai Bahasa Provinsi Bali nagingin kawéntenan buku-buku sané kaanggén bahan bacaan literasi ring para janané, utamanyané ring jagat pendidikan. Ngwéntenang buku anggén bahan bacaan wantah utsaha anggén nglimbakang literasi. Ngwéntenang bahan bacaan literasi sakadi satua mawiguna pisan anggén nincapang arsa ngwacén ring alit-alité miwah anggén numbuhang budi pekerti. Pinaka pahan utama anggén numbuhang karakter becik miwah pikayunan ngwacén ring alit-alite patut kaupapira saking anom, punika kakawitin saking kulawarga, sekolah, kantos ring para janané. Pakarsan ngwacén sané akéh ring para janané, kasokong antuk kawéntenan bahan bacaan sané becik miwah dangan kapolihang, pacang nincapang budaya ngwacén miwah nulis, inggih punika ring sekolah rauh ring para janané. Saking kawagedan antuk ngwacén puniki, literasi dasar minakadi numerasi, sains, finansial, digital, miwah budaya prasida kaupapira tur kalimbakang. Metunyané buku puniki madué tetujon mangda dados piranti anggén ngukuhang miwah nyokong GLN (Gerakan Literasi Nasional).